Translate
NESFAS dol jensalo u∙iani rongdikan gapgipa aro Ku∙pattigipa aro skie ra∙anina, niksamsoe nama ja∙ku de∙dilanina aro dingtanganiko ra∙bana chol on∙gipa, Pa Rathindra Nath Roy, porikka ka∙e nianio positive ong∙e sal 17-na quarantine dongani ja∙mano COVID-19 negative ong∙aha ine parakaton ritchengatako man∙aha.
Jedake NESFAS songrango sabisini ta∙rake giproroaoni naljoke dongna dakchakanirangko on∙a ja∙kurangko de∙enganio, uamang Chennai-o songdongbagipa, bilsi 72 ong∙gipa Pa Roy-ni sabisiko chena rokomari neng∙nikanirangko chagrongbaanio, cha∙a-ringanina simsakani, gisikni neng∙nikani aro dingtang dingtang nanganirangna mesoke talatanirangko ra∙a.
NESFAS: Ka∙sapae positive ong∙a ine porikka ka∙e niaoni an∙seng-baljokpilaha ine parakatani gisikni kattarangko sualatpabo.
Angni saksan donganirango maming saanirangko man∙gija matchotaha aro da∙o an∙seng-baljoke dongenga aro noktangchi re∙angpile nokni manderang baksa dongna kusi ong∙a. Indiba, ia sabisichi sapiltaina amani sakkirangni gimin namen simsakbee dongna nangengon, gisiko jajrenganide ia sabisini gimin u∙ina amgijagipa ong∙ani gimin aro ma∙sianio chu∙ongkujaengani gimin ong∙a. Anga an∙tangni gita ia sabisina positive ine porikka ka∙e nio man∙aoni quarantine ka∙a matchotaona dingtang dingtang gisik-ka∙tongo chagronganirangko man∙aha. Anga ia sabisiko man∙oba be∙en-ni gita saanirangko man∙jawa ine nike, aro uan ritchenggipa ong∙aigen ine kusi ong∙aiahachim. Anga angni nokdangna bang∙a bojarangko ra∙baaha ine u∙iachim maina anga gipin kamrangko ka∙chake dakchakna man∙jahachim. Salsa ba sal gnini ja∙mano anga COVID-19 positive ong∙aha ine rim∙a man∙ahaon, anga sabisiko ru∙utbatsrange sangipa specialist-ko Apollo Hospital-o grongeaha aro uni talatanirangko on∙ani ja∙mano anga namen ritchengatako man∙aha. Jensalo anga saksan dongna nangaha, unon saksan sikdikdik donganiara namen rakbegipa ong∙a ine anga u∙ina gita man∙aha. Ua rokomo, maina an∙ching mandeara saksa sakgipino pangchakgrike janggi tanggipa ong∙ani gimin uara altue chu∙sokatna amgijagipa ong∙achim.
Sing∙ani: Nang∙ni saksan ong∙ani salrango na∙ara mairangko dakaha, jean gipinrangna dakchakani ong∙gen?
Skanggipa jensalo na∙a an∙tangko saksan dongatani somaio, nang∙ni dongchakaniona man∙a dipet komibatsrange manderangko a∙palchiniko re∙baatna nanga aro ua re∙bagipa manderangba mask aro gipin PPE gri simsakgija re∙bana nangja. An∙tangtangni gisikni simsakanirango pangchake an∙tangtangna sulsul dakgnirangko tarisamsona nanga jekai palangtangni ba∙rarangko tem∙ani, an∙chini pressure ko porikka ka∙e niani, oxygen saturation-ko porikka ka∙ani aro ding∙a ba ka∙sinako niani, somaini kri cha∙rongbewalani, be∙enko ranta ka∙ani aro uandake. Anga bang∙en poraia aro anga bang∙a nianirangko dakja jekai television nianirangko, mongsongbate kobor-rangko maina anga songbad-oniko kobor-rangko man∙soahachim. Anga ia video koba, (https://bit.ly/39IgPJj) niahachim aro uan angko be∙en an∙seng-baljoke dongani u∙ianirangko on∙e dakchakahachim. Nangnikani somairango, anga do∙gachol sambao asongronge; Mumbai-o donggipa nokni manderangming aro angni demechikming phone-o golpoatrongachim. Uandake anga ong∙rongbewalo gitan nokni manderang aro ripengskarang baksa golpogrikachim. Be∙enni gita sabisirangko dakgrikani bilko bariatna gita anga mitam supplement-rangko ringachim jekai Vitamin C, Vitamin D, aro Zinc. Anga gingting gita satanikoba jakkalrongachim, ramram ong∙gipa karini sataniko, jedakode maiba saani dongora u∙ina gita, ua karini brinanio chipange gipin sadapanirangko baridapatjana gita ua gingtingo sataniko jakkalrongachim. Anga rang∙sitaniko ranta ka∙aniko bang∙en dakachim, jean angni ka∙sopko mangrakatgenchim, maina uan mongsongbate sabisichi neng∙nikaniko man∙batgenchim. Anga bilsi bregiminsan ong∙aigija indiba anga hypertension aro ka∙tong saanikoba man∙gipa ong∙achim, jenan mongsongbate doctor-rang jajrengbatachim.
Sing∙ani: Porikka ka∙e nianio Negative ong∙ahaon, nang∙ni ku∙pattianira mai ong∙genchim?
Porikka ka∙e nianio negative ong∙ahaoba, ku∙pattianide simsakgija ong∙kunabe, maina sabisioni chel∙chakaniko man∙aha ine bebera∙na nang∙o maming sakki dongkuja. Nang∙ko changsao porikka ka∙e nianio positive man∙ahani gimin, mask ko gangija kusi ong∙e roramna man∙aignok indake ong∙ja. A∙palchi ong∙katahaon pangnan mask-ko ganjringna nanga. Noko dongo sakgipinnoni chel∙tange dongna man∙jaode, na∙a mask-ko ganna nanga. Nang∙ni sabisi-de nang∙ko negative ine porikka ka∙manahaoba dongkuainaba donga. Na∙a ang gita, saanirangko man∙gijagipa ong∙oba, ba na∙a bang∙gija saanirangkosa man∙oba, ku∙pattianide angni banoba poraiman∙gimin gita, “Saa bilongjana agre hospitalchi re∙angnabe.” Indiba saa bilongode, nang∙ni re∙ronggipa hospitalchi, je biapkon na∙a u∙ibatachim aro je doctor-rangan nang∙ni saani itihasrangko u∙iachim uachi gamchatgipa somaiko aro kamrangko rakkie re∙angbo. Na∙a bilsi bregimin ong∙ahaode aro saronggipa ong∙ode, nangchongmota ong∙jaode, hospitalchi re∙angnabe maina nokona bate hospitalchi ia sabisiko man∙a kenchakanirang dongbata. Na∙a ia sabisiko man∙e nang∙na namjanaba donga, nambatgijagipade, na∙a gipinko saatgipaba ong∙naba donga. An∙ching iako gisik ra∙na, hospitalo manderang saaniko man∙ningbata. Nang∙ni be∙en-ni nang∙na mai ong∙enga uko agannaniko knachakbo.
Sir Rathin Roy – Photo Courtesy of S Jayaraj
Sing∙ani: Gisikni an∙seng-baljoke donganiara COVID-19 saaniko namatna gamchatgipa on∙gilani ong∙ama?
Katta mingsachi aganchakani ong∙ode, uan ong∙chongmota jedake na∙a skie ra∙enga ba na∙a u∙isokna amgijani gimin skie ra∙engachim, jeni miksonganian, na∙a maiko dingtangatna man∙gen uni giminsa chanchibo aro na∙a maiko dingtangatna man∙ja uni gimin jajrengnabe, rokomari chanchianirangna jajrenganiko dontongatbo aro na∙a maiko dake an∙tangko nambatatna man∙gen uni giminsa mongsongbate gisiko donne chanchibo. Ian sikdikdik ong∙ani gimin ong∙ja, indiba saksan ong∙ani aro saksan ong∙anio dongtoani gimin ong∙a. Bang∙gija kamrang jekon anga dakahachim aro jean manderangna dakchakaniko ong∙atnaba donga uaranga, anga COVID-19 ni gimin kobor-rangna agre an∙tangko gisiko nangatja. Gnigipa, angni chanchiani gita ian an∙chingko ka∙sinatani chol ong∙a, cha∙a-ringanio ka∙sinatani, golpo ka∙anio, neng∙takanio aro poraianio. An∙ching be∙enni gita an∙seng-baljoke donganio neng∙nikanirangni gimin jajrenga indiba gisikni gita an∙seng-baljoke donganio neng∙nikanirangni giminde jajrengskaja. Angni chanchia gita, an∙chingna bate an∙chingna simsakgiparangna uan nangchongmotgipa ong∙bata, beben nang∙ni skoo maia ong∙enga uko nang∙ni ma∙sianioba ong∙a. Indiba na∙a jajrengengode, dukko man∙engode, jajaengode, dakchakaniko am∙bo. Dakchakaniko am∙na an∙tangko seng∙nikaniko ba kratcha∙aniko galbo. Re∙ongkatbo aro dakchakaniko am∙bo. Manderang nang∙ni sokna amgiparang donga, jekai nang∙ni ripengrang aro nokni manderang jedakode uamang nang∙ko dakchakna man∙gen. Indiba, ka∙sapae gisikko on∙pachina, maina ian gamchatgipa ong∙a, mingsa angko dakchakgipara obostarang dingtangchongmotgen ine ka∙dongatanian ong∙a, uasan nang∙ni mingsa ka∙dongchakna man∙gipade. Obostarang re∙anggen, aro iaban re∙anggen. Anga sakantikon maiba see rakkianiko dakchina gita didipana sika, uan chanchichipe seani, chanchibewale seani, poedo, nang∙ni ma∙marikki chanchianirang, diary ba uandake jeba ong∙china. Indiba, pringo ba attamo minute 15-rangna sepachina, maikoba talatani ong∙chekaigija aro jajrenggija, indiba maikoba see rakkiani chanchianio ong∙atronganio ong∙china aro uan nang∙ko che∙elna aro obostarangko name nikanina dakchakgen. Sawa ma∙sia, na∙a uandake dakanichi lekka segipa-ona da∙ororo sokenaba donga.
Sing∙ani: Ia obostarangni gisepo sawa nang∙ko dakchakgipa ostro gita ong∙aha?
Nokdang! Nokdang! Nokdang! Nokdangna agreba, namgipa ripengrang jemangan nang∙ko niena gita man∙a, nang∙ko su∙channa, uan mairongpilani ong∙a. Angni be∙en an∙seng-baljokani gimin, ango namgipa doctor-rang donga, jemangan da∙ode angni namgipa ripengrang ong∙skaaha. Anga bisong baksa dongrongaha aro uamang angko nirok-simsakaha aro anga indake u∙iaha je angni nokdang ba ripengrang ba sangiparang baksa ong∙engon, anga nambatsranggipa jakrango ong∙jaoba, indiba anga namgipa jakrango ong∙aha, jean nambatsranggipachim. Uan nang∙ni gisikko dongtoata. Na∙a pilak norokni chanchianirangko skatang chanchichipe roja aro uan mairongpilatani ong∙a. Nang∙ni samba wilwilao ong∙enggipa obostarangni gimin na∙a bang∙gija u∙iatanirangkosan man∙a, uni gimin uan am∙sandianiko dakna aro apalbate chanchianiko ong∙atna dakchaka, jedakode na∙a maiko nienga uko ma∙sina gita man∙a. Na∙a maidake kobor on∙timgiparangni kobor ra∙timaniko aro maidake nang∙ona kobor-rang sokbaenga uarangko ra∙chaksona u∙ina gita man∙a, uan nang∙na ka∙donganiko on∙a maina uan na∙a an∙tangnade am∙sandianiko daksoaha ine mesoka.
Sing∙ani: Chanchichipe jangbingbanganirang baksa kakket ong∙anirang, an∙ching maidake kenaniara an∙chingni songsalo janggi tanganio namgijako ong∙atgniko champengsogen? Unbaksana, an∙chingni bringimin manderangni songsalo maidake dingtanggrikgipa kobor-rangko gelsona gita man∙gen?
Paraken agangenchimode, pilak songsalo janggi tanggipa manderangan tol∙gipa jangbingbangani aro mitdakanirang knana dakmajoaniko man∙a mande jat ong∙e, an∙chingni taningni kam ka∙ani gita, an∙chingara changsanon minggni kamrangko name ka∙na amgijagiparang ong∙a jean iandakgipa apchangketani somaio namen nangchongmotgipa ong∙achim. Dingtang dingtang obostarango saksa rai ra∙timenga. An∙ching man∙dikgipa baseanirango ramram ong∙anirangko basena namnika. Minggipinara, an∙chingara neng∙nikanirangni gisepo name chanchibewalna inditana changgiparang ong∙ja. Mesokna gita, na∙a ua ong∙anirang sakgipinona agre, nang∙onade maming saloba sokbajawa ine bebera∙ode, uan bebera∙gramani ong∙a. Uni gimin, neng∙nikanirango nambata chanchiani, miksongani aro chanchibewalaniko dakna nanganirangko ong∙katata. Iako dakna man∙a dipet nanggija biaprang jekai social media, mitdakani aro uandakgiparangko gelna nanga, jean nang∙ko jajaata aro namnikanirang baksa nang∙ko salangchapa. Gisik ra∙bo, bang∙bata social media baksa, nang∙gita chanchigipa manderang baksa bak ra∙pagipa ong∙naba donga. Nang∙gita chanchipa∙gijagipa manderangni kattarangko knae ra∙anio gamchata aro unosa na∙a skie ra∙na gita man∙a. An∙chingni songsalni gimin, iandake bebera∙anirang donga chong∙motan an∙chingni songsalni manderangde u∙isokna amgijanirangon bang∙bate dongtoaniko sakgipinrangna bate man∙a. Uandakgipa a∙selrango, uamango indakgipa obostarango nambata cholrang donga. Indiba nang∙o u∙isokgijanirang dongode, iarangna chol dakanio simsake ja∙ku de∙anian ong∙a, jeko miksongode, an∙chingoni bang∙bataan chong∙motgipa sakki aro u∙ianirang dongjagenchimode, indide anga iana ja∙ku de∙pana gita nangja. Simsake ja∙ku de∙anio, na∙a simsake chadenganiko daka. Mesokna gita, an∙ching badiaba sam an∙chingko nosto ka∙a ma uni rokomrangchi nosto ka∙a aro maidakgipa rokomo uko an∙ching kakkete ma∙sisokja. An∙ching je somaio uarangko ma∙sina gita man∙on, uan nosto ka∙mansogiminsa ong∙gnokchim. Indiba na∙a maiba nosto ka∙aniko ong∙atgen ine chanchichipsoahaode, indide uan simsake dongchina gita u∙ianiko ong∙ata. Minggipin songtango janggi tanggipa manderangni changanide, (indiba iani bidingo name pangchakkuna man∙kujaenga, indiba anga uan bebe ine ka∙donga) jekon Mexico-ni NESFAS Agroecology consultant, Dr. Francisco May toe aganatahachim, a∙songtangni manderang ong∙atgiminrang baksa ru∙uta somairangna janggi tangbringiparang ong∙a aro uni gimin uamang an∙chingna bate nambate obostarangko nirikkigiparang ong∙a. Uamang iarangoniko gisiktango ba see donanirangchi rakkirikanirangko daka, uamang iarangni gimin chanchibewalanirangko daka aro rokomrangko ma∙sina jotton ka∙a, uamang iani bidingo agan-talatgrikanirangko an∙tangtangni gisepo daka aro an∙tangtangni man∙gimin aro u∙ianirangchi nisusagrikaniko dake rikaniko daka. Ian u∙isokna amgijagipa COVID-19-ni neng∙nikanirango bilakbegipa skie ra∙ani chol mingsa ong∙a. Uni gimin na∙a gisiko nirikkia, na∙a knaa, na∙a chanchibewale paraka, na∙a skie ra∙a, na∙a an∙tangni ma∙sie ra∙ani gunko skatang bebera∙anirangni palo jakkala. Anga bebera∙anirang aro dakbewalrangni bobil ong∙ja, indiba bang∙bata bebera∙anirang aro dakbewalrangan sianggimin manderang gita nang∙ming golpogipa ong∙a. Batanggimin salrango jerangan ong∙angahachim uan uamangnade uan ra∙chakna amgipa chanchibewalani ong∙engnaba donga aro uanonikon uamang u∙ianirangko man∙engnaba donga. Indiba uan porikka ka∙e nina namgipa ong∙a, maina uara batanggimin salrango ong∙ahachim. Batanggimin salrango ong∙baahani gimin uan ong∙aiaha indake ong∙ja.
Sing∙ani: Name tarigimin a∙songtangni cha∙anirangba COVID-19-o manderangni immunity–ni gadangko tang∙doatna dakchakgipa ong∙a ine na∙a ra∙chakna man∙genma?
Angni ku∙pattianide a∙songtango man∙giparangkon cha∙bo ine ong∙genchim, maina uarangko altuaen samtangtangon man∙a aro na∙a maiko cha∙enga uko ma∙sia. Somaini kri man∙giparangko cha∙bo, pilak rokomni cha∙anirangko cha∙bo, aro cha∙ani rokomrangko gisiko donbo. Rongtalgipa cha∙aniko cha∙bo, nanga gita cha∙bo, maina na∙a rokomarigipa aro gisiko nangchakatgipa cha∙anirangko man∙aba donga, indiba na∙a namgiparangoniko chu∙onga gita cha∙jagenchimode, na∙a neng∙nikanirango ga∙aknaba donga, uni gimin chu∙onga gita cha∙ani namen gamchatgipa ong∙a. Indiba man∙gope, angni cardiologist angna pangnan indake agansimaia, badita na∙a komie cha∙a, bang∙bate re∙a, na∙a ru∙utbate tanggen. Da∙o, rasong gribee, na∙a komie cha∙genchimode na∙a mitam nutrient-rangkode man∙skajanaba donga. Uandake ong∙genchimode nang be∙en saanirangko man∙skagen, jekai me∙chikrang neng∙beanirangko man∙gen jean anemia ong∙aniko mesoka. Iani gisepo be∙enara iron ko nanggen aro nang∙ni cha∙ani nang∙na iako on∙jaengode, indide supplement-rangko ra∙bo. Uni gimin ka∙sapae nang∙ni be∙enko knachakpabo. Indiba nang∙ni cha∙ani mangmangsan nang∙ko mangrake dongatna chu∙ongja. Na∙a rongtalna gita nanggen, mask-rangko ganbo, chel∙tange dongbo, nang∙ni saanirangko jrongatbo aro supplement-rangko ra∙bo, be∙eni rantako ka∙bo, chanchie neng∙anirangko dontongbo aro jajrengnabe. Uni gimin, iandakgipa bringiminrang nang∙ni mangrake donganiko nambatatgen.
Sing∙ani: Nang∙ni apalgipa sagal ning∙tubeaoni u∙ianirangko ka∙sapae bang∙gija u∙iani kattarangko ba nangchongmotgipa an∙tangtangna, nokdangrangna aro songsalko ku∙monganina skie ra∙anirangko ia salrangna sualpachina aro maidakgipa simsakanirangko ia somaio an∙chingara niksamsona gita nanggen?
An∙ching Meghalaya aro Nagaland-ni manderangni gisepo jeon NESFAS aro uni bakrimgiparang maidake kamrangko ka∙engachim uni gimin bang∙gija u∙ie ra∙angna. An∙chingni songni manderang baksa songtango man∙giparangko cha∙ani, somaini kri man∙giparangko cha∙ani aro rokomari be∙enko an∙seng baljoke aro mangrake dongna cha∙anirangni gimin agan-talate ra∙anirango da∙o niatora giptokaha maina a∙gilsak gimiko gipenggipa sabisichi nokdangrangko, songsalni manderang songtangni biaprango chasongrikkiton man∙e cha∙baenggipa cha∙anirangko, chel∙bee re∙ange jedake songtango man∙gipa bitchilrangko chimonge tangchapilataona kinking soke ge∙piltaengaha. Songni manderang dingtang dingtang rokomrango an∙tangtangko ia giprorogipa sabisini gisepo tang∙doatengaha aro uandake mitamrang gisiko nangbee NESFAS-ni scheme-na namnikpaanirangko dake building-na korosrangko ata on∙gilpae aro bilgrigipa bilsi bregimin manderangna dongchakanirangko taridapna on∙gile saanirangko man∙giparangko chel∙tange an∙tangtangko saksan dongatna dakchakanirangko on∙aha. Ian namen gamchatgipa ong∙a, maina bilsi bregimin manderangan an∙chingna rakkirikrikbaenggipa u∙ianiko on∙giparang ong∙a. Jakkongsa merong-rangko salantian dingtang rakkie aro cha∙anirangko chimonge neng∙nikanirangko man∙giparangko dakchakna aro darangkoba watgaljana songni manderang gitcham dakbewalrang jekai Khaw Kham-rangko tangchapila∙tengaha. Mitamrangde gamgiparangko uamangni gamgiminrangko dokkanrangona sokatna aro nokantiona sokatna mobile phone-rangni dakchakanirangko ra∙engaha. Iarangan manderangni an∙tangtangni nangnikani aro neng∙nikanirangni gisepo ku∙cholsan chadenge, an∙tangtangni dakgnirang aro dal∙bata namgnirangna kam ka∙ani nama sakkirang ong∙a. An∙ching uandakgipa ka∙dongani bitchilrangko ripingna aro uarangko mangrake dal∙atna aro uamangni namgipa kamrangko ia giproroenggipa sabisini bon∙ani ja∙mano mangba dongatkuna man∙gen ine anga ka∙donga. Minggipin kattara an∙chingni a∙gilsak dingtangaha! Dingtangataniko ong∙atna namen rakbeani ong∙a indiba ia chonbegipa nikna man∙gijagipa sabisini jo∙ong an∙chingko janggi tanganina dingtangatna ama ine mesokaha. Ian mingsa an∙chingni skie ra∙na nanggipa ong∙a. Uni ja∙mano u∙isokna amgijani donga! Mikkangchi mai ong∙anggen uko an∙ching maming dakeba u∙ija. An∙chingni neng∙nikanirang aro u∙igijanirangni paksao maiba gital, u∙igijani, dongdipgija dingtangani aro nawang changatanirang an∙chingko mikkangchi maiarang ong∙bagen niksamsoatna gita amatja. U∙isokgijaniara dongtogijani ong∙a, uni gimin gimikan ‘gitcham’ NAMPILTAIANI-chi re∙angpilani ba, maiba, ‘gital’ NAMPILTAIANI-ni gimin golpotokenga. Anga, an∙tangde, gitcham nampiltaianichi re∙angpilna sikja, maina uan kangalgipa ba namgijagipa uni biapo nambatsranggipa nampiltaiani ong∙a. An∙chingara cha∙betbonggipa, dugae gisik on∙gipa aro dugae pilakkon dakgipa ong∙ahachim. An∙ching an∙tangtangkosan chue nikaha aro ong∙atgiminrangko onnike, knal dongjawa ine nosto ka∙aha. An∙ching ia giprorogipa sabisichi dontongatako, tom∙tom dongatako aro chanchianiko ong∙ataniko aro maiba dingtanganiko ong∙atahani gimin mittelna nanga. Uni gimin u∙isokgijanio namgniba donga, maina an∙ching mikkangchi maia ong∙baenga uko ma∙sijagenchimode indide an∙ching maikoba an∙chingni nangnikenggipako ong∙atna kam ka∙na gita man∙gen. An∙chingni mikkangchi nangnikenggiparangko! Uni gimin, angni ku∙monganide gitcham nampiltaianiko ong∙atna sikaniko dontongatani ong∙a aro uni palo ku∙cholsan re∙mikkangbae mikkangchina an∙chingni nangnikanirangna chanchiani aro uarangna kam ka∙anirangna ong∙a. An∙chingsan itihaso ia neng∙nikanirangko jakkale Gital Daktaianiko (Renaissance) jatchio ong∙atna, Europe-o U∙ianiko Teng∙suatani (Enlightenment), jean bilakbegipa sabisi (plague)-ni ja∙mano, a∙gilsakko dingtangatahachim! Uni gimin anga COVID-19-ni ja∙mano, maiba gital, maiba namani, maiba nambatgipa ong∙ani aro gisikni ronggrikani ong∙bagen ine ka∙dongenga. Aro maiba, kale maiba, a∙songrangni songni manderangchi maidake ong∙atgiminrang aro an∙tangtang baksa nangrimgrike janggi tangna nangachim uko an∙chingna mesokgen.
