Translate
Hapdeng ka lock down, bun napdeng jongngi ngi ia pynlut por hala ki jong ki iing ki sem. Ka jingbatai ki riew shemphang, ki ong ba kawei na ki lad ban ialeh pyrshah ia u COVID-19 dei ban tei ia ka bor met (immunity) da kaba bam bun jait ki thup jingbam. Ka Food and Agriculture Organization (FAO) jong ka United Nations kala phiah ia ki thup jingbam ha ki 10 tylli. La kumno kumno dei ban bam 5 tylli ki thup jingbam ha ka shisngi ban biang pura ka met ka phad. Ka jingkylli ka mih pat nangno kein ngin ioh ia kine khamtam ki jhur jyrngam lada ngim don jaka ban thung ban tep?
Lyngba ka jingtrei jong ka NESFAS; ngi lah pyrshang ban ai kane ka khubor sha ki nongshong shnong ba kumno ki dei ban leh. Naduh ba sdang ka lock down ha u snem 2020 bun tylli ki longing kila sdang ban thung ia bun jait ki jhur hala I kper lajong. Don ruh napdeng jongki kila pyrshang ban thung ia ki jhur khlaw ha ki kper iing. Bad ngi iohi ba mynta kila sdang ban iohbam khamtam kum ha kane ka por bym plie ki iew ki hat. Kaba iohnong shuh shuh kadei ba ia kine kim ju pyndonkam dawai.
Ka jaka thung syntiew ha Cathedral Laitumkhrah, ba lah pynkylla jaka thung jhur noh.
Lyngba ka jingiakren bad I Fr. Bernard Laloo, Director, Social Service Centre, Cathedral Shillong; I ong ia kine ki kyntien “Bun na ngi khamtam ha sor ngim da don ka jaka kaba heh kaba ngi lah ban pynlong kum ka kper jhur. Ha kane ka por lockdown ngi sngewthuh ia ka jingkordor jong ka kper iing (Kitchen garden ha kaba ngi lah ban thung ki jhur ban ioh bam na ka bynta ia lade. Khlem artatien baroh na ngi ngi don ka phyllaw iing ha kaba ngi thung ki syntiew bad pyndonkam ban iaidkai. Khyndiat ne shibynta na kine lah ban pynlong kum ka kper jhur. Wat ha phyllaw dewbilat lah ban shan rynsan barit bad thung ki jhur ba pur ha khiew syntiew, ha ki tin ne wat ha ki byrni plastic. Hapdeng kane ka iing nga thung ia ki jhur ba nga ioh symbai na ki shnong ba ngi trei bad ia ki jhur khlaw nga ioh hi na kyrpong iing. Ki jhur ba nga thung ki kynthup: Muli, Pudina, Shymprong kthang, Salad, Jaud, Jamyrdoh, Kawang, U ri, Jhur-thliem bad Sohkhia
Ka kper kaba don ha iing i Bah Rundolf Mawlieh
Nga ioh ia kren ruh bad I para ba iatreilang, Bah Rundolf Mawlieh, iba shong basah ha Lumjingshai, Shillong i pynpaw ruh ka jingkmen ba ka iing ka sem jongi ka dap bahuh bha ki jhur tang na I kper iing barit. “Manla ka sngi, nga pynlut por kumba katto katne kynta ha I kper lajong ryngkat bad imei bad kane ka iarap khambha ia kam ba nga trei ha NESFAS, ban pynneh pynsah ia ki jingthung tynrai” pynkut I Bah Rundolf Mawlieh.
Nga kyrmen lyngba ine I khana barit in ktik jingmut iangi ban shim ia ki sienjam ban sdang hala I kper ne kyrpong iing lajong.
Ia kane ka jingthoh lah pynmih ha u khotkhubor Rupang bad Syllad ruh
